عوام ووٹ کی طاقت سے نفرت کی سیاست کو مسترد کردیں،شہباز شریف

اسلام آباد: وزیر اعظم شہباز شریف نے عوام پر زور دیا ہے کہ وہ اپنے ووٹ کی طاقت سے تقسیم، نفرت اور انتشار کی سیاست کو مسترد کریں۔

اپنے ایک ٹوئٹ میں انہوں نے کہا کہ ایک فرد کی انا اور نااہلی اور طرز سیاست نے پاکستانی معاشرے کی خوبصورتی کو برباد کر دیا ہے۔ انہوں نے عوام کے انتخاب پر مکمل اعتماد کا اظہار کرتے ہوئے کہا کہ وہ قومی ترقی اور اپنے بچوں کے روشن مستقبل کے لیے ووٹ دیں۔

شہباز شریف نے کہا کہ گزشتہ 4 سالوں میں پنجاب کو بدترین طرز حکمرانی کی مثال بنا دیا گیا۔ شہری اور طلباء مفت ادویات اور وظائف سے محروم ہو گئے۔ انہوں نے کہا کہ سرکاری نوکریوں، پوسٹنگ اور تبادلوں کی کھلی فروخت ہو رہی ہے۔ شہری سہولیات درہم برہم تھیں اور لاقانونیت اپنے عروج پر تھی۔ انہوں نے کہا کہ پنجاب کی خراب حالت صوبے کے عوام کی توہین سے کم نہیں۔

وزیراعظم نے کہا کہ عوام پنجاب کے ضمنی انتخابات میں ووٹ ڈالتے ہوئے عمران نیازی کے چار سالہ سیاہ دور میں تبدیلی کے نام پر کرپشن، نااہلی، معاشی تباہی اور مافیا کی سرپرستی کے بارے میں ضرور سوچیں۔ انہوں نے کہا کہ پی ٹی آئی کے دور حکومت میں پاکستان اپنے مقصد سے ہٹ گیا اور آپ اپنے ووٹ کے ذریعے اس کا اظہار کر سکتے ہیں۔

This website uses cookies to improve your experience. We'll assume you're ok with this, but you can opt-out if you wish. Accept Read More