پاکستانی امن سپاہ کی قربانیوں کا عالمی سطح پر اعتراف کرنا اعزاز ہے، وزیراعظم

اسلام آباد: وزیراعظم شہبازشریف نے اقوام متحدہ کے امن دستوں کے عالمی دن پر پاکستانی امن دستوں کی کاوشوں اور قربانیوں کو خراج تحسین پیش کیا ہے۔

وزیراعظم شہبازشریف نے اقوام متحدہ کے امن دستوں کے عالمی دن پر اپنے پیغام میں کہا کہ عالمی امن کا قابل فخر فرض نبھانے والے اقوام متحدہ کے امن دستوں کو سلام پیش کرتے ہیں ۔اقوام متحدہ کی امن کارروائیوں میں سب سے زیادہ دو لاکھ دستے فراہم کرنا پاکستان کی امن دوستی اور امن پسندی کا مظہر ہے۔

وزیراعظم نے کہا کہ پاکستانی امن سپاہ کی قربانیوں اور کاوشوں کا موجودہ سیکرٹری جنرل سمیت اقوام متحدہ کے ادارے اور عالمی سطح پر اعتراف کیا جانا ایک اعزاز ہے۔ قوم کے بیٹے اور بیٹیوں نے دنیا بھر میں قیام امن، انسانی خدمت اور مثالی پیشہ وارانہ صلاحیتوں کا مظاہرہ کیا۔

وزیراعظم شہباز شریف کا کہنا تھا کہ امن کارروائیوں کے دوران پاکستان کے169 بیٹوں نے شہادتوں کا عظیم مرتبہ پایا۔ دنیا بھر میں افواج پاکستان کے پیشہ وارانہ طرزعمل اور مشکل ترین حالات میں مثالی کارکردگی کا اعتراف باعث افتخار ہے۔

This website uses cookies to improve your experience. We'll assume you're ok with this, but you can opt-out if you wish. Accept Read More