کسان کارڈ کے اجراء سے کسانوں کو سہولیات ملیں گی، عمران خان

اسلام آباد: وزیراعظم عمران خان کا کہنا ہے کہ زراعت میں بہتر میکانائزیشن ٹولز اور آئی سی ٹی سے چلنے والی توسیعی خدمات کے متعارف ہونے سے پاکستان میں انقلاب برپا ہو جائے گا ۔

وزیر اعظم عمران خان کے زیرصدارت ملک میں زراعت میں بہتری سے متعلق منصوبے پراجلاس ہوا۔دوران اجلاس وزیراعظم کو بتایا گیا کہ یوریا کی مصنوعی قلت پیدا کرنے والے افراد کے خلاف انتظامی اقدامات کیے جا رہے ہیں۔وزیر اعظم نے صوبائی چیف سیکرٹریز کو ہدایت کی کہ وہ ہمسایہ ممالک بالخصوص افغانستان کو یوریا کی غیر قانونی ترسیل کو روک کر اس کی دستیابی کو یقینی بنائیں۔

انہوں نے ملک میں مویشیوں کی افزائش اور دودھ کی پیداوار کو بہتر بنانے کے لیے بچھڑے کی پرورش کے مراکزقائم کرنے اور مصنوعی انسیمی نیشن کی بہتر تکنیک متعارف کرانے کی بھی ہدایت کی۔وزیراعظم نے متعلقہ حکام کو ہدایت کی کہ کپاس، گندم اور چاول جیسی بڑی فصلوں میں تحقیق کے لیے پنجاب اور کے پی میں سنٹرز آف ایکسیلینس قائم کیے جائیں۔

وزیراعظم عمران خان کا کہنا تھا کہ کسان کارڈ کے اجراء سے کسانوں کو مشینری اور زرعی سامان خریدنے میں سہولت ملے گی۔

This website uses cookies to improve your experience. We'll assume you're ok with this, but you can opt-out if you wish. Accept Read More