مسجد نبوی واقعے پر عمران نیازی معافی مانگیں، رانا ثنااللہ

اسلام آباد:وزیر داخلہ رانا ثناءاللہ کا کہنا ہے کہ مسجد نبوی بے حرمتی کیس میں گزشتہ روز ڈیوٹی جج اٹک نے شیخ راشدشفیق کوجوڈیشل ریمانڈ پرجیل بھیج دیاہے۔مسجد نبوی والے افسوسناک واقعے سے کروڑوں مسلمانوں کے جذبات مجروح ہوئے ہے۔

وزیر داخلہ رانا ثناءاللہ نے مسجد نبوی بے حرمتی واقعے سے متعلق اپنے ایک بیان میں کہا ہے کہ ڈیوٹی جج اٹک نے شیخ راشدشفیق سے موبائل فون برآمد کرنے اوراسکے فرانزک کاحکم بھی جاری کیا ہے تاہم شیخ راشدشفیق کا اپنا موبائل فون پولیس کے حوالے نہ کرنا عمران نیازی اور شیخ رشید کے مسجد نبوی بے حرمتی واقعے میں براہ راست ملوث ہونے کوتقویت بخشتا ہے۔

وزیر داخلہ نے کہا کہ مسجد نبوی بے حرمتی واقعے پر عمران نیازی کوبطور چیئرمین پی ٹی آئی بلا تاخیر قوم سے معافی مانگنی چاہئے۔ مسجد نبوی بے حرمتی واقعے میں ملوث پی ٹی آئی ارکان کے خلاف فی الفورانضباطی کاروائی عمل میں لائی جانی چاہئے۔

رانا ثنا اللہ کا کہنا تھا کہ پی ٹی آئی کا بطور جماعت اورعمران نیازی کا بطور چیئرمین مسجد نبوی بے حرمتی واقعہ کی مذمت نہ کرنا انتہائی قابل افسوس ہے جبکہ پی ٹی آئی کا بطور جماعت مسجد نبوی بے حرمتی واقعے سے اظہار لا تعلقی نہ کرنا بھی انتہائی قابل تشویش ہے۔

This website uses cookies to improve your experience. We'll assume you're ok with this, but you can opt-out if you wish. Accept Read More