معاشی صورتحال کی وجہ سے جرائم میں اضافہ ہورہا ہے، شیخ رشید

اسلام آباد: وفاقی وزیر داخلہ شیخ رشید کا کہنا ہے کہ ای وی ایم ہی دھاندلی کوروکنے کا ذریعہ ہے۔ پارلیمنٹ کے مشترکہ اجلاس کے فیصلے کا پتا چل جائے گا ۔ پوری امید ہے اتحادی ہمارے ساتھ چلیں گے ۔

پولیس لائنز ہیڈ کوارٹرز میں پولیس شہداء کے لواحقین کو امدادی پیکج دینے سے متعلق تقریب سے خطاب کرتے ہوئے وزیر داخلہ شیخ رشید احمد نے کہا کہ اسلام آباد پولیس بہتر طریقے سے کردار ادا کر رہی ہے۔ پولیس کا کام بہت مشکل ہے۔معاشی صورتحال کی وجہ سے جرائم میں اضافہ ہو رہا ہےجس سے ان کا کام اور مشکل ہو جاتا ہے۔ جرائم کو روکنا بھی انہی لوگوں کی ذمہ داری ہے۔

انہوں نے کہا کہ 74سال ہو گئے ہیں وفاق کی اپنی فرانزک لیبارٹری نہیں ہے۔ کوئی کیس ہو جاتا ہے تو لاہور بھیجنا پڑتا ہے۔ وہ ہمارا سارا کیس خراب کر دیتے ہیں۔ دسمبر سے پہلے پہلے اس پر کام شروع ہو جائے گا۔ انہوں نے کہاکہ ہم چاہتے ہیں کہ پولیس میں نوجوانوں کو بھرتی کیا جائے۔ اسلام آباد پولیس کو مثالی پولیس بنائیں گے۔

انہوں نے کہا کہ شہداء کے لواحقین کو سلام پیش کرتا ہوں۔میری کوشش ہے کہ شہداء کے لواحقین کی فائلیں ایک ماہ کے اندر اندر کلیئر ہو جائیں۔ انہوں نے کہا کہ پی ڈی ایم قانون ہاتھ میں نہیں لے گی تواچھے طریقے سے ملیں گے ۔ صوبوں کامسئلہ بھی ہوتومظاہرین اسلام آباد آجاتے ہیں ۔

This website uses cookies to improve your experience. We'll assume you're ok with this, but you can opt-out if you wish. Accept Read More