زرعی ترقی حکومت کی اولین ترجیح ہے، شبلی فراز

فیصل آباد: وفاقی وزیر برائے سائنس اینڈ ٹیکنالوجی سید شبلی فراز نے کہا ہے کہ زرعی ترقی حکومت کی اولین ترجیح ہے۔ زراعت کو نئی جدتوں سے ہمکنار کرتے ہوئے زرعی محقیقین کو کاشتکاروں کے مسائل کا سائنسی بنیادوں پر حل تلاش کرنا ہو گاتاکہ فوڈ سکیورٹی اور فی ایکڑ پیداوار میں اضافے کو یقینی بنایا جا سکے۔

زرعی یونیورسٹی فیصل آباد کے دورہ کے موقع پر سید شبلی فراز نے کہنا تھا کہ تحقیقات کو لائبریری کی زینت بننے کی بجائے کاشتکاروں کے مسائل کے حل اور زرعی ترقی کے لئے نئی ٹیکنالوجی متعارف کروانی چاہیے۔

انہوں نے کہا کہ ناقص بیج کی وجہ سے کسانوں کو مشکلات کا سامنا ہے تاہم زرعی یونیورسٹی کا مجوزہ تصدیق شدہ بیج کا منصوبہ اس چیلنج سے نبردآزما ہونے کے لئے سنگ میل ثابت ہو گا۔ وفاقی حکومت زرعی یونیورسٹی کے پراجیکٹ کو کامیاب بنانے کے لئے بھرپور تعاون کرے گی۔

ان کا کہنا تھا کہ برصغیر کی پہلی زرعی درس گاہ ہونے کی حیثیت سے زرعی یونیورسٹی فیصل آباد بے پناہ خدمات سرانجام دے رہی ہے ۔حکومت توقع کرتی ہے کہ زراعت کو نئی بلندیوں سے ہمکنار کرنے کے لئے تحقیقات اور تربیت یافتہ افرادی قوت کی فراہمی کو یقینی بناتے ہوئے صف اول کی درس گاہ ہونے کا اعزاز قائم رکھے گی۔

شبلی فراز نے کہاکہ زرعی سائنسدانوں کو انفارمیشن ٹیکنالوجی کی مدد لیتے ہوئے جدید رحجانات کی ترویج کے لئے آئی ٹی ایپلی کیشن متعارف کروانی چاہئیں تاکہ کاشتکاروں کو فوری جدید معلومات دستیاب آ سکیں۔ اکیڈیمی، انڈسٹری اور حکومت کو مل کرمشترکہ کاوشیں بروئے کار لاتے ہوئے زرعی ترقی اپنا کردار ادا کرنا ہو گا۔

وفاقی وزیر نے کہا کہ حکومت موجودہ حالات سے ہم آہنگ اور اپلائیڈ تحقیقات کے کلچر کو فروغ دینے کے لئے کوشاں ہیں۔ انہوں نے کہا کہ جدید رحجانات بشمول ہائیڈروپونک کے متعلق کاشتکاروں میں آگاہی پیدا کرنا ہو گی۔

This website uses cookies to improve your experience. We'll assume you're ok with this, but you can opt-out if you wish. Accept Read More