وزیراعلیٰ پنجاب عثمان بزدار نے صوبے میں پولیو مہم کا آغاز کردیا

لاہور: وزیراعلیٰ پنجاب عثمان بزدار نے بچوں کو انسداد پولیو کے قطرے پلا کر صوبے بھر میں پانچ روزہ مہم کا آغاز کردیا۔ عثمان بزدار کا کہنا ہے کہ گھر گھر جا کر انسداد پولیو کے قطرے پلانے والے ورکرز قومی ہیرو ہیں۔

وزیراعلیٰ آفس لاہور میں انسداد پولیو مہم کے حوالے سے خصوصی تقریب کا انعقاد کیا گیا جہاں وزیراعلیٰ عثمان بزدار اور وزیر صحت ڈاکٹر یاسمین راشد نے بچوں کو قطرے پلائے۔

اس موقع پر گفتگو کرتے ہوئے وزیراعلیٰ پنجاب نے کہا کہ دو روز ویکسین سے محروم رہ جانے والے بچوں کو انسداد پولیو کے قطرے پلانے کیلئے وقف ہوں گے جبکہ مہم کے دوران مجموعی طور پر صوبہ بھر میں ایک کروڑ70 لاکھ بچوں کو انسداد پولیو قطرے پلائے جائیں گے جبکہ مہم میں ایک لاکھ 56 ہزار سے زائد پولیو ورکرز شریک ہوں گے۔

انہوں نے بتایا کہ فرنٹ لائن پولیو ورکرز کو کورونا ایس او پیز، پروٹوکول اور حفاظتی اقدامات پر تربیت دی گئی ہے جبکہ کورونا ایس او پیز پر عملدرآمد یقینی بنایا جائے گا۔ وزیراعلیٰ پنجاب کا کہنا تھا کہ گزشتہ 6 ماہ کے دوران پنجاب سے حاصل ہونے والے تمام ماحولیاتی نمونے پولیو وائرس سے پاک نکلے، بچوں کو پولیو سے محفوظ بنانا قومی ذمہ داری ہے۔

This website uses cookies to improve your experience. We'll assume you're ok with this, but you can opt-out if you wish. Accept Read More