این سی او سی نے اومی کرون ویرینٹ کے تیزی سے پھیلنے سے خبردار کردیا

اسلام آباد: این سی او سی نے کورونا وائرس کے اومی کرون ویرینٹ کے تیزی سے پھیلنے سے خبردار کردیا۔ نیشنل کمانڈ اینڈ آپریشن سینٹرکے اجلاس میں لازمی ویکسینیشن کیلئے سخت اقدامات کا فیصلہ کیا گیا ہے۔

وفاقی وزیر اسد عمر کی زیر صدارت این سی او سی کے اجلاس میں ملک میں کورونا کی صورتحال اور اس کے بڑھتے کیسز اور ویکسینیشن مہم کا جائزہ لیا گیا۔اجلاس میں نیشنل کوآرڈینیٹر این سی او سی میجر جنرل ظفر اقبال اور ڈاکٹر فیصل سلطان بھی شریک ہوئے۔

این سی او سی اجلاس میں بتایا گیا کہ گزشتہ تین دن میں کراچی میں کورونا کیسز میں تیزی سے اضافہ ہوا ہے اور وہاں کورونا مثبت کیسز کی شرح 2 سے بڑھ کر 6 فیصد ہو گئی ہے۔ این سی اوسی اجلاس میں بریفنگ کے دوران بتایا گیا کہ کورونا ویکسین لگوانے والے افراد اومی کرون سے کم متاثر ہوتے ہیں۔ شہری کورونا کی پانچویں لہر سے بچنے کیلئے ویکسین لازمی لگوائیں، ماسک کا استعمال اور سماجی فاصلے پر عملدرآمد کیا جائے۔

این سی اوسی اجلاس میں ویکسینیشن کے لازمی نظام کے حوالے سے سخت اقدامات کرنے پر اتفاق کیا گیا۔ اجلاس میں ضلعی سطح پر ویکسینیشن کے اہداف کا بھی جائزہ لیا گیا۔ صوبوں کو ویکسینیشن کے مقررہ اہداف جلد حاصل کرنے کی ہدایت کی گئی۔

This website uses cookies to improve your experience. We'll assume you're ok with this, but you can opt-out if you wish. Accept Read More