تازہ ترین
وزیر خارجہ کی عالمی بینک کے صدر سے ملاقات

وزیر خارجہ کی عالمی بینک کے صدر سے ملاقات

نیویارک(25ستمبر، 2018)اقوام متحدہ کی جنرل اسمبلی اجلاس میں شرکت کے لیے امریکا میں موجود پاکستانی وزیر خارجہ شاہ محمود قریشی نے عالمی بینک کے صدر جم یونگ کم سے ملاقات کی۔

شاہ محمود قریشی نے بتایا کہ انہوں نے صدر ورلڈ بینک سے بھارت کے ساتھ پانی کے مسئلے پر بات کی، عالمی بینک سندھ طاس معاہدے کا امین ہے۔

خیال رہے کہ پاکستان نے بھارت کے کشن گنگا اور رتلے پروجیکٹ پر ورلڈ بینک کو درخواست دے رکھی ہے۔

وزیر خارجہ شاہ محمود قریشی نے کہا کہ پاکستان کو بھارت کے کشن گنگا اور رتلے پراجیکٹ پرسنگین اعتراضات ہیں، ہم چاہتے ہیں ورلڈ بینک اس معاملے میں اپنا کردار ادا کرے، صدر عالمی بینک کو بتایا کہ ہمارا خطہ کس طرح پانی کے بحران سے دوچار ہو رہا ہے۔

انہوں نے کہا کہ ہم نے صدر ورلڈ بینک کو بتایا کہ پانی کے مسئلے کا حل ہمارے لیے بہت ضروری ہے، پانی کے مسئلے سے ہماری زرعی ضروریات متاثر ہو رہی ہیں، ورلڈ بینک کو ہماری درخواست پر غور کرنا چاہیے۔

وزیرخارجہ شاہ محمود قریشی کے مطابق صدر عالمی بینک نے وعدہ کیا ہے کہ اس معاملے پر وہ ایک اور کوشش کریں گے۔

شاہ محمود قریشی اور عالمی بینک کے صدر کے درمیان ہونے والی ملاقات میں امریکا میں پاکستان کے سفیر علی جہانگیر صدیقی بھی موجود تھے۔

خیال رہے کہ وزیر خارجہ شاہ محمود قریشی اقوام متحدہ کے جنرل اسمبلی اجلاس میں شرکت کی غرض سے اِن دنوں امریکا میں موجود ہیں، جہاں 29 ستمبر کو نیویارک میں وہ جنرل اسمبلی سے خطاب کے دوران عالمی امور پر پاکستان کا مؤقف پیش کریں گے، جبکہ کشمیریوں پر ہونے والے بھارتی مظالم بھی دنیا کے سامنے رکھیں گے۔

وزیر خارجہ شاہ محمود قریشی کی اپنے امریکی ہم منصب مائیک پومپیو سے ملاقات 2 اکتوبر کو ہوگی۔

یہ بھی پڑھیے

وزیرخارجہ اقوم متحدہ کے اجلاس میں شرکت کےلیے نیویارک پہنچ گئے

Spread the love

Comments are closed.

Scroll To Top