تازہ ترین
عظیم گلوکار محمد رفیع کا 94 واں یوم پیدائش آج منایا جارہا ہے

عظیم گلوکار محمد رفیع کا 94 واں یوم پیدائش آج منایا جارہا ہے

کراچی :(24 دسمبر 2018) برصغیر پاک وہند کےعظیم گلوکار محمد رفیع کا 94 واں یوم پیدائش آج منایا جا رہا ہے۔ رفیع کے گائے سینکڑوں گیت آج بھی بے انتہا مقبول ہیں۔ ان کی آواز سننے والوں پر سحر طاری کردیتی ہے۔

موسیقی کی دنیا کے بے تاج بادشاہ محمد رفیع گائیکی کا ایسا ہنرلے کر پیدا ہوئے تھے، جو قدرت کسی کسی کو عطا کرتی ہے۔ سروں کے شہنشاہ محمد رفیع 24 دسمبر1924 کو امرتسر کے گاؤں کوٹلہ سلطان سنگھ میں پیدا ہوئے۔ انہوں نے لاہور ریڈیو سے پنجابی نغموں سے اپنے سفر کی ابتداء کی، موسیقی کا شوق انہیں ممبئی لے آیا اور پھر فلم انمول گھڑی کے گانے سے کیرئیر کا اغاز کیا۔انہوں نے گیتوں کے علاوہ غزل ، قوالی اوربھجن گا کربھی لوگوں کومحظوظ کیا، ان کو کلاسیکی ، شوخ اور چنچل ہر طرح کے گیت گانے میں مہارت تھی۔ محمد رفیع نے چالیس ہزار سے زائد گانے گائے۔ محمد رفیع نے ہندی فلموں کے 4516، نان ہندی 112 اور 328 پرائیویٹ گانے ریکارڈ کرائے۔

ان کے مشہور گانوں میں چودھویں کا چاند ہو، یہ دنیا یہ محفل میرے کام کی نہیں، میرے محبوب تجھے، کیا ہوا تیرا وعدہ ، بہارو پھول برساؤ، کھلونا جان کرتم تو، میں نے پوچھا چاند سے، یہ دل تم بن لگتا نہیں، آج پرانی راہوں سے ، لکھے جوخط ، احسان تیرا ہوگا ،یہ ریشمی زلفیں اوردل جو نہ کہہ سکا کے علاوہ دیگر شامل ہیں۔دلوں پر راج کرنے والے رفیع نے نہ صرف اردو اور ہندی بلکہ میراٹھی، گجراتی، بنگالی، بھوجپوری اور تامل کے علاوہ کئی زبانوں میں بھی ہزاروں گیت گائے۔ محمد رفیع نے اپنے کیرئیر میں بطور پلے بیک سنگر متعد ایوارڈز حاصل کیے جن میں نیشنل فلم ایوارڈ، 6 بارفلم فیئرایوارڈ اور حکومت انڈیا کا سرکاری اعزاز پدم شری شامل ہیں جو انہیں 1967 میں دیا گیا جبکہ ان کے انتقال کے 20 برس بعد 2000 میں انہیں بہترین سنگرآف میلینیم کا اعزاز سے نوازا گیا۔

محمدرفیع 31جولائی 1980کوجہان فانی سے کوچ کرگئے، ان کی گائیکی آج بھی برصغیر میں مقبول ہے۔ آج انہیں ہم سے بچھڑے ہوئے کئی سال ہوگئے مگر وہ اپنی آواز کے ذریعے آج بھی اپنے لاکھوں چاہنے والوں کے دلوں میں زندہ ہیں۔

یہ بھی پڑھیے

فواد خان اور ماہرہ خان کی فلم “مولا جٹ ٹو” کا ٹریلر جاری

ہندی میڈیم کے سیکوئل میں شاہ رخ اور کاجول جلوے بکھیریں گے

Comments are closed.

Scroll To Top